بسم الله الرحمن الرحمن
حساب الانستقرام الخاص بالمدونة
استقبل عليه الاستفسارات جميعها + فيه صور مرفقة برأيي الشخصي لكثير من الأماكن
اسطنبول ماتحتاج تعريف ولا مقدمات ، أعتبرها من أفضل الوجهات السياحية اللي تجمع بين الطبيعة والأكل الحلو و الحياة الليلية النشيطة و المتاحف التاريخية ..
* أي اسم مكان أزرق اضغطوا عليه بينقلكم لموقع المكان أو صفحته على بوكينق
\\
* أي اسم مكان أزرق اضغطوا عليه بينقلكم لموقع المكان أو صفحته على بوكينق
\\
نقاط مهمة سريعة :
- الشعب التركي غالبيته مايحكي انجليزي لكن يحكون مكسر ويحاولون يفهمون ويتكلمون كلمات عربية مكسرة للسياح العرب عشان يتواصلون معهم
- الحلو في اسطنبول أن العربي مستحيل يضيع أو يحس بغربة فيها لأن العرب بوجهه في كل ناحية يساعدونه سواء مرشدين سياحين أو مطاعم أو مكاتب
- شخصيًا أشوف أن السفرة لتركيا حلو لو تكون مستفردة لتركيا فقط ومدنها دون الانتقال لدولة أخرى ، تركيا أجوائها مختلفة ومميزة وتستاهل الرحلة فيها وقت خاص لها تكتشفونها
- الشعب التركي طبيعته قوي في التعامل فتوقعوا منهم ردات الفعل القوية دائمًا وحاولوا ماتدخلون بنقاش شاد معهم
- الرائحة الكريهة موجودة بالأماكن المزدحمة بشكل مقرف لذلك الأفضل يكون معكم كمامات طبية أريح لكم
- تركيا أعتبرها شخصيًا شينة للأطفال لأنها تفتقر للمدن والأماكن الترفيهية المناسبة لعمرهم ، غالب الأماكن السياحية للكبار وكلها مطاعم وطبيعة و أسواق وشوارع تسوق.
- طبعًا الحجاب والغطا وكل أنواع العبايات والحجابات مقبولة في تركيا وشفت كل الأنواع والأشكال.
- لاتحتاج تركيا فيزا أو تأشيرة دخول تستخرج مسبقًا إنما يتم ذلك في المطار فقط عند ذهابك ، و بالنسبة لحاملين الجوازات الدبلوماسية مايحتاجون ولا شيء حتى بالمطار.
- من وجهة نظري أشوف اسطنبول في الشتاء أجمل من الصيف.
- من وجهة نظري اسطنبول يكفيها أسبوع .. اسطنبول فقط وليس تركيا!
- أكرر : كل أسماء الأماكن مدعمة بروابط اضغطوا عليها وبتنتقلون لمواقعهم على قوقل مابز أو صفحة بوكينق.
أفضل مناطق السكن :
- أفضل الأماكن هي اللي تكون قريبة من كل حاجة ويكون حولكم مطاعم و بحر و سوق .. منطقة بشكتاش beşiktaş من المناطق الكويسة و حلوة للسكن وراقية
- منطقة السلطان أحمد Sultan Ahmed تعتبر مركز مهم من مراكز اسطنبول وفيها كثير معالم تاريخية مثل آيا صوفيا و قصر توب كابي ، وفيها مطاعم وقهاوي كثيرة. المنطقة تصلح للي ودهم بمكان سياحي و حولهم معالم تركية بحته وتاريخية ، المنطقة حلوة ونشيطة لكنها مزدحمة و تفتقد للحياة الليلية يعني بعد الغروب كل شي يتقفل وتكون هادية.
- منطقة ميدان تقسيم Taksim ، أعتبرها داون تاون اسطنبول .. نشيطة جدًا والحياة فيها ماتوقف ولا تهدى ، مطاعمها مفتوحة في الليل ومليانه سياح و مزدحمة وفيها فنادق خياراتها كثيرة. طبعًا ميدان تقسيم كبير جدًا وفيه كثير من الفنادق و الشارع الأساسي في الميدان ، شارع الاستقلال .. كثير مايحبونه بسبب زحمته و كثرة السرقات فيه لكنه حلو في الليل وسيع صدر مرة.
- منطقة نيشنتاشي ، منطقة تعتبر مرتفة الأسعار و تعتبر مكان العوائل الثرية التركية وغالب المشاهير الأتراك يتمشون فيها و يطلعون لمقاهيها ، فيها بوتيكات دور الأزياء العالمية ومقاهي ومطاعم راقيه و الحياة الليلية فيها نشيطة .. شارع عثمان بيك للتسوق قريب من هذي المنطقة ... المنطقة مناسبة لذوي الدخل المرتفع ومناسبة للي جايين اسطنبول عشان يتسوقون.
- منطقة ترابيا ، منطقة بعيدة عن مركز المدينة لكنها رايقة جدًا و الاطلالة منها على اسطنبول تفتح النفس ، المنطقة اسمها منسوب للعرب أصلًا وكثير من السياح يسكنون في فلل ويستأجرون أدوار اذا سكنوا فيها بدل الفنادق ، لأن إطلالتها تشبه إطلالات بيوت المسلسلات التركية .. اللي يحبون وسط المدينة وودهم فيها ، يسكنون فيها ثلاث أيام تغيير وترويح للنفس.
أماكن إقامة مجربة موصى بها :
- فندق CVK بالقرب من ميدان تقسيم مطل على البسفور .. جربته شخصيًا وميتة عليه! فندق مجنون من كل النواحي ورائع بكل ماتعنيه الكلمة. نظام الفندق أنه مقسم لأدوار وكل دور بإسم أميرة عثمانية .. أثاث الفندق و خدماته و تصميمه مبهر ، الفندق فيه مبنى كامل للغرف ومبنى منفصل للشقق الفندقية ، وأنا جربت الشقق الفندقية مممممتازة للعوائل الكثار وراقية و تستاهل مبلغها ومطله على البسفور وفيها بلكونات ومطبخ متكامل .. الفندق له فرع آخر في تقسيم لكن عادي مب مثل جمال وفكرة هذا الفرع .. هذا الفرع يبعد عن ميدان تقسيم وشارع الاستقلال مسافة دقيقتين فقط مشيًا على الأقدام.
- Turcuaz شقق فندقية موجودة في منطقة بشكتاش مناسبة للعوائل ، أجنحة مرتبة وكل ديكورهم لونه تركواز .. موجودة على شارع مشهور في اسطنبول وهو شارع سليمان سيبا.
- فندق فورسيزنز اسطنبول / فرع بشكتاش ، جربته شخصيًا .. مطل على البحر و يمكن من خلاله مشاهدة مضيق البسفور .. الفندق خرافي وخيالي وممتاز ويستحق التجربة بعيدًا عن مركز اسطنبول المزدحم .. منطقة الفندق قريبة جدًا من بشكتاش يعني بالمشي ١٠ دقائق بس ، خدمات الفندق مايحتاج أمدحها لكن الجميل فيه أنه مريح وراقي و مطل البحر لازم تزورونه حتى لو لقهوة فقط مب للسكن.
- فندق كيمبنسكي اسطنبول فرع بشكتاش ، الفندق ماجربته شخصيًا لكن انمدح لي كثير و قريب من الفورسيزنز مابينهم شيء و نفس المطل و المنظر ، عمومًا كل هالاثنين أنصح الأزواج المسافرين أو اللي مسافرين شهر عسل مايسكنون في غيرهم .. رقي نظافة استرخاء استجمام كل حاجة.
نبدأ الآن بالـ أماكن السياحية :
١- الأماكن التاريخية و المتاحف
كل الأماكن التاريخية مرتبطة بقصة أو حادثة أو تراث وحضارة معينة خصوصًا الأماك الإسلامية اللي تخص هويتنا ، لذلك حلو لو تقرأون عن كل مكان تقصدونه قبل تروحون له عشان يكون عندكم فكرة وتحسون بعظمته ومايكون مجرد مكان سياحي ضيعتوا وقت فيه!
١- متحف آيا صوفيا : لازم تزورونه .. يقع مقابل مسجد السلطان أحمد ، هذا المتحف تم بناؤه ككنيسة لمدة ٩١٦ سنة ثم تم تحويله لمسجد في عهد الدولة العثمانية لمدة ٤٨١ سنة وهو أول مسجد صلى فيه الفاتح عندما فتح القسطنطينية ، وبعد سقوط الدولة العثمانية و ظهور دولة تركيا الحديثة أصبح متحف تاريخي .. سعر الدخول للمتحف ٤٠ ليرة تركية ، والأطفال تحت ١٢ سنة مجانًا ، أوقات الزيارة في الشتاء من الساعة ٩ص - ٥م ، و في الصيف من الساعة ٩ص - ٧م ، ويغلق شباك التذاكر قبل وقت الإغلاق بساعة.
٢- قصر توبكابي TopKapi و الحرملك : أكبر القصور العثمانية في اسطنبول ، يعتبر القصر مركز إقامة سلاطين الدولة العثمانية لمدة أربع قرون ، و بجانب القصر توجد منطقة سكن الحرملك .. ممتع جدًا جدًا واللي بيتحمسون له كثير اللي يعرفون حريم السلطان .. شخصيًا انبسطت فيه وعجبني و زيارته في الشتاء أتوقع أفضل من الصيف.
عالسريع :
- المكان جميل جدًا لكن زيارته لازم تكون في يوم غير مشمس و الجو حلو و تطلعون له مبكر
- المكان من الداخل مافي أكل ولا شرب فخذوا معكم موية مثلًا داخل القصر تشربونها
- الأفضل تدخلون المكان بدون أطفال لأنه بس مشي ومعلومات وتأمل تاريخي و هندسي فما أتوقع يبسطهم
- داخل القصر توجدغرفة الأمانات المقدسة اللي فيها آثار للرسول - اللهم صل وسلم عليه - حيث توجد سيفه و عصاته وضرسه وجزء من شعره وإحدى خطاباته بالإضافة إلى سيوف الصحابة ومفاتيح الكعبة.
- القصر مفتوح يوميًا ماعدا يوم الثلاثاء.
- القصر مفتوح في الشتاء من الساعة ٩ص - ٤م
- القصر مفتوح في الصيف من الساعة ٩ص - ٦م
- سعر دخول القصر ٤٠ ليرة و سعر دخول الحرملك ٢٥ ليرة ، والأطفال تحت ١٢ سنة مجانًا.
- يغلق القصر في ( أول يوم رمضان ، ٣٠ آغسطس الذي يوافق يوم النصر ، ثاني يوم من عيد الأضحى )
- بالقرب من القصر فيه محلات كثيرة تبيع ملابس حريم السلطان والسلاطين بإمكانكم شرائها كذكرى.
٣- مسجد السلطان أحمد : مسجد عثماني قديم ، هو أكثر معلم تتميز به صور تركيا ، يتميز بلونه الأزرق وبقبة واحدة كبيرة حولها ستة مآذن و ثمانية قباب صغار .. قريب من قصر توب كابي ، ومقابل لمتحف آيا صوفيا وبينه وبين المتحف حديقة حلوة ومشهورة فيها كراسي و ناس يبيعون أكل ( ايسكريم ، عصيرات ، كستناء ... )
٤- قصر دولمة بهجة : قصر عثماني كان يعتبر بمثابة المركز الإداري للإمبراطورية العثمانية ، يقع في منطقة بشكتاش بعيد عن ازدحام منطقة السلطان أحمد ، القصر تحفة فنية مليئة بالزخارف والأسقف المذهبة و فيه تاريخ أتاتورك وحياته وحمامه ومجلسه وبعض أشيائه .. فيه أيضًا حديقة القصر مذهله و اطلالة القصر على البحر وموقعه حلو ومميز .. زيارته مهمة طبعًا.
٥- بانوراما التاريخ : يشبه المتحف ممتلئ لوحات و تتبعون قائد ومرشد عربي يحكي لكم بالعربي عن كل معركة وحدث تاريخي مشيرًا للوحة ، وفي الدو العلوي توجد قبة بانورامية ثلاثية الأبعاد فيه كل المعارك التي وقعت أثناء فتح اسطنبول ، ممتع جدًا جدًا وفكرته جديدة و يسرد التاريخ بصورة حلوة.
٦- روملي حصار : وهو عبارة عن قلعة فيها زي الحصار أو نسميه السور العالي جدًا بناه محمد الفاتح في ٦ أشهر فقط ، تمهيدًا لدخول اسطنبول .. المكان جميل تاريخيًا و المطل على البحر حلو لكن اللي يزور كل الأماكن التاريخية الأخرى ماأتوقع يزوره ، لأنه متعب شوي يحتاج صعود و مافيه مقاهي ولا كشكات ولا مطاعم جواه بالرغم أن فيه حدائق حلوة اطلالتها خرافية علي البحر! حلوة زيارته لكن ليست بتلك الأهمية.
٧- ميني ترك : حديقة تضم كل معالم و أماكن تركيا المهمة بشكل مصغر ، المساجد صغيرة والقصور صغيرة كل شي نسخة مصغرة .. حلوة مرة للكبار والأطفال ، وأنصحكم تزورونها في بداية زيارتكم لإسطنبول لأنها تختصر لكم أشياء كثير ، داخل الحديقة فيه كشكات تبيع كريب و كستناء وفيه محل هدايا وتحف عثمانية وتركية و أيضًا فيه استوديو صغير تلبسون فيه ملابس عثمانيه ويصوركم داخل ثيم عثماني سلطاني حلوووو كذكرى لازم تسوونه لأطفالكم خصوصًا ، في كل زيارة لأسطنبول أزور الحديقة واستمتع عادي مامليت منها!
٢- التسوق
١- استينيا بارك : مجمع تسوق راقي جدًا فخم من أجمل المولات اللي دخلتها مرتب ويجمع بين الماركات العالمية الغالية والمتوسطة ، فيه مطاعم داخل السوق وفيه سينما .. وفيه شارع ماركات تبع السوق يكون خارجي عليه جلسات حلوة ومقاهي رايقة مثل لادوريه .. مهمة زيارته.
٢- زورلو : مجمع تسوق تصميمه مجنون ، فيه مطاعم كثيرة متنوعة و حلو لو تتغدون أو تتعشون فيه ، فيه جهة كاملة مختصة بالمطاعم التركية وغيرها .. فيه أيضًا جلسات خارجية لقودايفا و مقاهي أخرى خارجية ، الماركات العالمية مثل Dior , Prada وغيرها موجودة في ممر زجاجي رائع .. عادي حتى لو مب شارين روحوا تفرجوا على التصميم لأنه غريب صدق وفخم ، طبعًا في السوق من داخل فيه جميع أنواع المحلات وفيه محل apple و mac وفيه عدة ماركات تركية تصاميمهم حلوة.
٣- كانيون : شخصيًا مازرته لكن كثير سمعت مدح عن فكرته كيف تصميمه لولبي غريب ويعتبر راقي و محلاته مجموعة من بين الماركات العادية و العالمية .
٤- جواهر مول : سوق يقال أنه مخيس ، أنا مازرته لكن من كلام السائق و من كلام كثير ناس ماينصحون فيه مطلقًا مقارنة بالأسواق الأخرى.
٥- اسطنبول مول : كبير وفيه محلات كثيرة و خيارات متعددة مرة ومطاعم وملاهي وسينما ، اتوقع أنه اكبر سوق في اسطنبول ، شخصيًا ماعجبني التسوق فيه لأني ماأحب الأسواق المتعبة في المشي و محلاته أحصلها في استينيا بارك و زورلو + المجمع كلع مغلق مافيه شي خارجي أو فكرة غريبة كأننا في الرياض مب اسطنبول! عمومًا أفضل شي فيه الملاهي كويسة للأطفال وكبيرة بينبسطون فيها.
٦- شارع عثمان بك : يقع الشارع في منطقة شيشلي .. شارع مليان محلات تسوق غالبها ماركات تركية ، تجدون على هالشارع بوتيكات فساتين سهرة وأزياء تركية كثيرة و أسعارهم حلوة أقل من أسعار نيشنتاشي .. واللي جايين يدورون فساتين زواجات أسعارها حلوة ومن مصممات تركيات أقولكم من هذا الشارع بتلقون فساتين سهره حلوة بأسعار حلوة.
٧- شارع عبدي إيبكجي في نيشنتاشي : تكلمت عن هذي المنطقة من ضمن مناطق السكن قبل ، ومثل ماقلت تعتبر منطقة غالية ومرتفعة أسعارها .. وتراها قريبة جدًا من شارع عثمان بيك تنزلونه منه عليها .. المهم هذا الشارع فخخخم مليان ماركات عالمية و راقي جدًا عليه مقاهي رايقه وراقيه كل المحلات اللي فيه أسعارهم مرتفعة .. الشارع تصميمه أوروبي بحت ومبانيه طرازها فخم.
٨- شارع استقلال : طبعًا مليان شارع استقلال محلات كثيرة لكن ماأحسه مريح في التسوق بسبب الازدحام فيه ، لكن فيه بعض المحلات فيه حلوة وتستحق الزيارة يعني أثناء تمشيتكم تمرون وتشترون منها + فيه مجمع بالمنتصف مغلق فيه محل الكترونيات وسينما و محل سيفورا كبير .. حلو جدًا ومرتب.
٩- شارع بغداد : موجود هذا الشارع بالطرف الآسيوي من اسطنبول ، شخصيًا مازرته لكنه مليان محلات من ماركات تركيه وعالمية مختلفة و فيه مطاعم كثيرة .. وطول الشارع تقريبًا ٦كم .
١٠- السوق المصري Spice Bazaar و السوق المسقوف Grande Bazar : من أقدم الأسواق في تركيا بينهم مسافة ١٠ دقايق مشي ، و بالتأكيد بتحرص أمكم على زيارتهم ، حلوين استمتع أنا بزيارتهم كل مرة ، يبيعون البهارات والشاي وأنواع القهوة و الحلقوم والمكسرات .. فيه أيضًا محلات تبيع التحف والأواني التركية بالإضافة للوح والديكورات و أرواب الحمامات التركية بأشكال مختلفة صناعات تركية ، كل الاثنين حلوة بس احرصوا على اغراضكم من السرقة ولاتخافون كل السوق فيه باعة سوريين بيساعدونكم في أنواع الشاي والبهارات والحلقوم التركي.
٣- الأماكن الحيوية في اسطنبول
١- شارع استقلال في ميدان تقسيم : حكيت عنه قبل طبعًا ، يعتبر أكثر مكان حيوي ونشيط ومليان سياح و مواطنين في اسطنبول و بعيد تمام البعد عن البحر والرواقة ، كله فرق تطبل وتغني و الترام يمر بالوسط أحيانًا الترام يكون فيه فعاليات لو كان فيه مناسبة .. ومليان محلات من كل الطبقات وكل الأصناف بس يعتبر الشارع للجميع مب راقي ، في الشارع فيه كافيه MADO و فيه محلات شاورما تركية تفتح لما الفجر و فيه مطعم برجركنج و مكان لصرف العملات وتبديلها و محل بقلاوة لذيذ جدًا في بداية الشارع بالقرب من الميدان احرصوا تاخذون منه.
٢- منطقة الأرتاكوي : منطقة نشيطة فيها محلات شعبية و مقاهي على البحر و تشوفون جسر البسفور منها من زاوية حلوة وقريب منها مسجد الأرتاكوي المشهور في كل صور اسطنبول بألوانه وشكله ، المكان جميل جدًا بالنهار وفي الليل بعد لما تبدأ أنوار الجسر تنور .. فيه عدة مقاهي وجلسات حلوة للإفطار و تنفع وقت روقان يعني مجرد قهوة وحلى وأشهر كافيه عندهم MADO موجود بالمنطقة ، أنصحكم بالشتاء تروحون لها أي وقت تبون وفي الصيف حلوه قبل الغروب بساعه تحضرون الغروب ومنظره وتتمشون و تروقون فيها ، بالنسبة للمحلات الشعبية كلها تبيع أساور شغل يدوي ومصنوعات خشبية و غالبية الباعة يتوددون من العرب كثير وينادون كل بنت خليجية تمر " ياهيفا وهبي يانانسي ".
٣- شارع بغداد : مثل ماحكيت عنه مسبقًا موجود في الطرف الآسيوي و نقلًا عن أحد صديقاتي " جميل مرتب ومنظم وفيه محلات رايقة ومطاعم وكوفيات زي Divan وGuniden قونايدن وNumnum واذا انتهيتوا من التسوق تروحون للبحر قريب من الشارع وتجلسون على الثيل أو تاخذون قارب "
٤- منطقة ترابيا : حكيت عنها مسبقًا ، إذا ماتقدرون تسكنون فيها لازم تزورونها لأنها من وجهة نظري هي تركيا الحقيقية ، منظر اسطنبول من ترابيا يفتح النفس خصوصًا في النهار متعة حلو حلو ويارب يكون وقتها الجو حلو .. افضل مطعمين مهم تزوزونها في ترابيا هي كاش بياز Kaşıbeyaz و Big Chefs .. كاش بياز اطلالته خرافيه احرصوا تجلسون على طاولة مطلة وتاخذون منه بقلاوته لذيذة و المطعم الثاني انمدح لي كثير ويقولون المنيو كله رائع والحلا عنده ممتاز.
٤- حدائق و أماكن عامة
١- تل العرائس : تل مرتفع مليان مسطحات خضراء ومطل على اسطنبول من الأعلى ، وغالب العرايس التركيات يجونه يحتفلون بزواجهم وجلسات تصويرهم تكون فيه ، للأمانه آخر مرة رحته يمكن عام ٢٠٠٧ وكان مزدحم بالعرايس بس مدري لازالوا يجونه أو بطلوا ! الله أعلم .. المهم أنه ممتع ويعتبر مكان لعامة الشعب كل الطبقات موجودة وفيه مطعم رخيص و مطعم مرتفع الأسعار .. تقدرون تصعدون للتل كامل مشي أو تستعينون بتاكسي يوصلكم نصف المسافة.
٢- حديقة أولوس بارك : حديقة مرتفعه غالبًا يكون جوها بارد بسبب ارتفاعها وفيها مطعم ، حلوة وأعتبرها أرقى من تل العرائس.
٣- تلفريك أيوب الذي يوصلك لمقهى بيرولوتي : اللي يروح اسطنبول وماجرب يركب تلفريك ماكأنه راح اسطنبول ، حتى لو المركبة ريحتها مو كويسة و تخافون من الارتفاع لازم تجربون! + التلفريك قريب من جامع أيوب الأنصاري و بالقرب من مقبرة تستطيعون مشاهدتها وأنتم في التلفريك ،، المنطقة بالأعلى حلوة مرة وباردة ، فيها مقهى بيرولوتي المشهور جدًا من مسلسل سنوات الضياع .. تقدرون تشربون فيه شاهي و فيه ايسكريم و ذرة و بطاطس مقلية .. المنظر ساحر رائع ، أجمل وقت للزيارة في الشتاء يكون المكان جميل .. بعد كذا تقدرون تتمشون في المنطقة فيها محلات شعبية العاب واكسسورات وسوفينيرز .. و ترجعون بالتلفريك أيضًا .. تكلفة التلفريك ٣ ليرة للذهاب والعودة .. وتكفي المركبة ٨ اشخاص تقريبًا وفيها كراسي مب واقفين والانتظار فيها سريع مايطول.
٤- ملاهي فيالاند VIALAND Park : ممتعة ومرتبة و ونيسة .. ملاهي وفيها مول للتسوق و فيه مطاعم وفيه فندق أيضًا ، مكان ترفيهي متكامل للعائلة ، بإمكان العائلة يتقسمون كل شخص واهتمامه .. الملاهي حلوة وفيها ألعاب للكبار مثل قطار الموت الأحمر و لعبة الشلال و كل معلومات الملاهي تحصلونها في موقعهم الرسمي مترجم للعربي هنا ، تستاهل يوم كامل.
٥- لاتفوتون تركبون قارب في اسطنبول ، و لو كان بصحبتكم سائق تركي أو عربي خلوه يدبرلكم القارب لأنه بيختار لكم قارب نظيف و مرتب تقدرون تاخذون فيه راحتكم و تاخذون أكلكم معكم وتجلسون فيه كم ساعة .. و المكاتب السياحية ماتقصر بهالأمور لكن ماأحس يحتاج تلجأون لهم.
٦- برج الفتاة و مطعمه : برج صغير مشهور في اسطنبول ، يقع في وسط بحر مرمرة على نقطة التقاء قارة آسيا بأوروبا ، البرج دايم يظهر في المسلسلات كمعلم تركي مهم ، يرمز للفتاة وترجع قصته لأسطورة قديمة تستطيعون البحث عنها .. المهم ماتقدرون توصلون للبرج إلا عن طريق قارب ياخذكم له ، قوارب حوله تكون عامه للجميع تاخذ مجموعات بمبلغ بسيط .. في جزيرة البرج يوجد مطعم رايق ومناسب للأزواج أو اللي في شهر عسل لأنه هادي و ومكانه حلو.
٧- حديقة قولهانه Gülhane Parkı : حلوة والجلسة فيها حلوة بعد.
٨- حديقة قصر يلدز Yıldız Park : ممتازة وطبيعتها حلوة.
٩- حديقة أمرغان كورسو Emirgan Korusu : حلوووة ، هادية وكبيرة ممتعة للاسترخاء وللأطفال يركضون وفيه ألعاب زحاليق ومراجيح حاولو تكونون قريبين منها لأن الحديقة كبيرة مرة لذلك انزلوا بمكان مناسب لكم .. الحديقة حلوة في الشتاء فيها مقهى ومطعم صغير جواها اسمه sarı köşk تشربون فيه شاهي وتاكلون كنافة .. المطعم ستايله كأنه قصر وجلساته الخارجية حلوة تركية بحته ..
١٠- غابات بلغراد Belgrad Ormanı : غابات كبيرة خضراء تبعد عن اسطنبول ٥٠ دقيقة تقريبًا ، تاخذون معكم أكلكم سواء شوي أو غداء جاهز وتطلعون لها .. طبيعتها جميله و ممتعة للعائلة الأطفال يكون معهم سياكل ولا أي ألعاب و فيه جلسات خشبية منتشرة بالغابة للجلوس فيها .. ممتازة لنزهة عائلية بين الطبيعة والشجر أحبها تغيير جو عن المطاعم والأسواق.
١١- أكواريوم Turkuazoo : حوض سمك كبير داخل سوق فورم اسطنبول ، مثل أكواريوم دبي مول .. مناسب للأطفال جدًا لكن لو أطفالك مو من اهتمامهم ماأفضل الذهاب له.
١٢- متحف الألعاب في اسطنبول : متحف موجود في الطرف الآسيوي ، يتكون من أربع أدوار تجمع ألعاب وشخصيات قديمة وحديثة ، مناسب جدًا للأطفال بينبسطون فيه وفيه مقهى بالداخل ستايله طفولي .. مفتوح أيام الأسبوع من ٩:٣٠ص - ٦م و في أيام الويكند مفتوح من ٩:٣٠ - ٧م ... سعر الدخول الكبار بـ١٢ ليرة ، والأطفال بـ٩ ليرات .
٥- مطاعم وكوفيات مهمة وموصى بها بكثرة
١- مطعم Suda Kebap : يشبه فكرة مطعم برج الفتاة لكن غالي وراقي جدًا و لذيذ للأمانه ، شاعري و مناسب للأزواج أيضًا واللي مسافرين شهر عسل .. مؤكولاته تركية ويشتهر بالكباب .. يعتبر أرقى و أهدى من برج الفتاة لأن أسعاره مرتفعة ، توصلون للمطعم عن طريق قارب ياخذ مجموعات له ، ناسية اسم منطقة قواربهم بالضبط لكن بس وقفوا مقابل المطعم بالقرب من القوارب هنا وبتجدون قارب خاص بالمطعم ينقلكم.
٢- قهوة عشق Aşşk Kahve : اللي يروح اسطنبول ومايجرب هالمكان مجنون!! جربت وجبة الفطور عندهم من ألذ الأطباق .. عسل وقشطة وأجبان وبيض وعصير وكل حاجة لذيذة ، المكان مشكلته أنه صغير ومزدحم الناس فوق بعض بس البحر ومنظره يهون كل شي .. الخدمه كويسة إلى حد ما ، والأكل مايحتاج أوصفه لازم تجربونه فطور ولازم تذوقون القشطة بالعسل لذيذة ماتذوقون مثلها بأي مكان بالعالم.
٣- كاش بياز Kaşıbeyaz : تركي .. ذكرته سابقًا ضمن منطقة ترابيا .
٤- المطعم العالمي : تركي لذيذ ومطل على البحر ، أكلت منه أثناء ذهابي للمطار لأنه قريب منه جدًا.
٥- Big Chefs : مؤكولات عالمية متنوعة ، مازرته شخصيًا لكن كثير كثير يمدحونه ويمدحون كل المنيو من الأطباق الرئيسية حتى الحلا ، عنده ستيك وباستا ورز ، متنوع بالأصناف.
٦- مطعم ضياء Ziya Sark Sofrasi : تركي .. رائع ولذيذ و جلساته حلوة مرة ، لو مغلقه بتكون حولكم ومحيطة فيكم أشجار ولو مفتوحة أجمل بتكون الأشجار جنبكم ومنظرها حلو.
٧- MADO مادو : أشهر قهوة عندهم ومنتشرة بكل مكان وأكيد تعرفونها من دبي أو الكويت موجودة ، لكن في اسطنبول أعتبرها ألذ والفطور عندهم أفضل بكثير .. فروعهم كثيرة لكن من وجهة نظري أفضل فرع اللي في الأرتاكوي المنظر فيه حلو و صغير ملموم مب في نص الزحمة مثل فرع شارع استقلال.
٨- مطعم الملك و مطعم المدينة : مطعمين يقدمون مؤكولات تركية مو ذاك الرقي جلساتهم بسيطة جدًا و جو المطعمين مزعجة شوي صجة .. لكن الأكل فيها تركي أصيل ولذيذ ، لازم تروحون لواحد منهم عشان ماتتحسفون لما تسمعون كلام سياح غيركم ... المطعمين يقدمون المقبلات بالعرض بدون منيو و من أشهر الأطباق اللي عندهم اللحم اللي داخل جرة ، المطعمين كلها بصراحة أشوفها أخذت شهره بين السياح مبالغ فيها خصوصًا مطعم الملك ، والسبب طريقة تقديمهم المميزة فقط و بالنسبة للأكل أشوفه ممتاز لكن مايستاهل هالإزعاج! لكن أذكياء جدًا في التسويق لوحهم مكتوبة بالعربي وصور المشاهير العرب اللي زاروا المطعم تزين الجدران.
٩- فطور فندق كيمبنسكي و فندق فورسيزونز البسفور حلو تجربونهم حتى لو ماسكنتوا فيهم ، المنظر حلو يفتح النفس صدق خرافي و الأكل لذيذ واختاروا جلسات خارجيه طبعًا .. روحوا لهم فطور أو مجرد قهوة وحلا مطله على البسفور.
١٠- مطعم نصرت Nusr-Et : مايحتاج المطعم مدح معروف جدًا وله فرع في دبي ، المطعم مختص باللحوم والستيكات .. سعره مرتفع جدًا .. جلساته حلوة لكن متلاصقين ببعض الطاولات أحسه متزاحم ، الخدمة ممتازة .. طعمه لذيذ جدًا ويختلف عن طعن فرع دبي ، أشوفه أفضل بكثير ، أشهر وجبه عندهم الكفتة بالجبن لذيذة جدًا + حلا البقلاوة بالايسكريم ممتع صنع النادل له و لذيذ طعمه .. من وجهة نظري أشوف هذا المطعم مكان سياحي للعائلة.
١١- على نفس شارع مطعم نصرت فيه مطاعم كثيرة ثانية ، مثل P.F.Chang's الصيني و غيرها. بإمكانكم اكتشافها من خلال تطبيقات الهاتف المتعددة التي أرشدتكم باستخدامها.
١٢- مطعم Huqqa : لذيذ جدا جدا وراقي وجلساته مميزة و غالب العرب يروحون له كثير لأنه يجمع بين اللذة والمكان الأنيق ، لكن سلبيته هو أنه مكان للشيشة ويتميز فيها وأصلًا اسمه على الشيشة ، فما أنصح فيه للعوائل اللي تتأذى من ريحتها وجو الكتمة.
١٣- قهوة دنياسي Kahve Dünyası : قهوة مشهورة ومنتشرة عندهم علامتها عنابي بأصفر ، مستواها حلو ، خفيفة يعني وعلى السريع تاخذون منها قهوة وخفايف زي ستاربكس .. وسعرها متوسط مناسب للجميع.
٦- التنقل والمواصلات :
شخصيًا كل مرة أسافر يكون مرافق لنا سائق صديق للعائلة عراقي الأصل يحكي لغة عربية وتركية ، و فيه مثله كثير من السائقين العرب اللي رزقهم مرتبط بسياحة العرب .. تختارون السيارة اللي ترغبون فيها وهم يجلبونها لكم ويقودونها عنكم ويرشدونكم ويوجهونكم بكل مكان .. ممتعة جدًا السياحة في اسطنبول مع سائق فاهم بكل مكان ، مكاتب السياحة مليانه و تستطيعون إيجاد السائقين العرب بكل سهولة ومتخصصين بذلك ، وأنصح العوائل الكبيرة أنها تاخذ سائق أفضل بكثير.
و بالنسبة للي ماودهم بسائق خاص أو مايستطيعون تحمل تكلفته أو مايرغبون بمرافقته لهم دائمًا ، هذا رابط يوضح لكم جميع أنوع وسائل المواصلات والتنقل بطريقتها وأسعارها من الباصات العامة و الميترو حتى التاكسي ، اضغطوا هنا
..
//
أتمنى للجميع رحلة ممتعة وآمنة ..
ستكون هنالك تدوينة منفصلة بإذن الله مختصة بالمناطق السياحية خارج اسطنبول ( جزر الأميرات ، أبانت ، طرابزون ، اوزنغول ، بودروم ، أنطاليا ، بورصة )
أ.هـ
